BTR ত চাৰিওফালে বলিছে এতিয়া নিৰ্বাচনী বতাহ । পৰিষদীয় চৰকাৰ গঠন কৰিবলৈ চলিছে প্ৰতিটো দলৰ প্ৰচাৰ। ওদালগুৰিৰ ভেৰগাঁও সমষ্টি দখল কৰিবলৈ পূৰ্ণ ৰূপত সাজু হৈ উঠিছে বিজেপি । সমষ্টিটোৰ বিজেপি প্ৰাৰ্থী জৌশ্ৰাং বড়োই দুগুণ উৎসাহত চলাইছে নিৰ্বাচনী প্ৰচাৰ।
সমগ্ৰ বিটিআৰ তে এতিয়া চৰ্চা কেৱল পৰিষদীয় নিৰ্বাচনৰ। হাতত আৰু বেছি দিন নাই। সেয়ে প্ৰতিটো দলেই নিজৰ নিজৰ সমষ্টিৰ ৰাইজৰ কাষ চপাত ব্যস্ত হৈ পৰা পৰিলক্ষিত হৈছে। BPF – UPPL ৰ সমান্তৰালকৈ বিটিচি নিৰ্বাচনৰ বাবে ভাৰতীয় জনতা পাৰ্টিয়ে ৰাজনৈতিক তৎপৰতা অব্যাহত ৰাখিছে।দেওবাৰে দলটোৱে ওদালগুৰিৰ ভেৰগাঁওত কেইবাখনো নিৰ্বাচনী সভা অনুষ্ঠিত কৰে।
এই সভাতেই ভেৰগাঁও সমষ্টিৰ বিজেপি প্ৰাৰ্থী জৌশ্ৰাং বড়োৰ দাবী-এইবাৰ ১০০% ই পদুম ফুলিব পৰিষদীয় ভেৰগাঁও সমষ্টিত। কিয়নো ৰাইজৰ সমৰ্থনে বিশেষকৈ উৎসাহিত কৰিছে দলটোক। কেৱল ভেৰগাঁও সমষ্টিয়ে নহয়, বিজেপিয়ে প্ৰাৰ্থীত্ব প্ৰদান কৰা ওদালগুৰিৰ ৭ সমষ্টিতে বিজেপিৰে নিচান উৰিব বুলি দাবী জৌশ্ৰাং বড়োৰ। দেওবাৰৰ নিৰ্বাচনী সভাত বিজেপিৰ নীতি আদৰ্শৰ প্ৰতি আকৰ্ষিত হৈ বহু লোকে আনুষ্ঠানিকভাৱে বিজেপিত যোগদান কৰে।
প্ৰচাৰ অভিযান চলাই ভেৰগাঁও পৰিষদীয় সমষ্টিৰ বিজেপি প্ৰাৰ্থী জৌশ্ৰাং বড়োই সমষ্টিটোৰ দ্ৰুত উন্নয়নৰ স্বাৰ্থত ভাৰতীয় জনতা পাৰ্টিক ভোটদান কৰিবলৈ আহ্বান জনাই। তেঁও লগতে প্ৰধানমন্ত্ৰী নৰেন্দ্ৰ মোদী , কেন্দ্ৰীয় গৃহমন্ত্ৰী অমিত শ্বাহ আৰু অসমৰ মুখ্যমন্ত্ৰী হিমন্ত বিশ্ব শৰ্মাৰ প্ৰচেষ্টাত বিটিআৰত শান্তি প্ৰতিষ্ঠা হোৱা বুলি উল্লেখ কৰি বিটিআৰৰ স্থায়ী শান্তিৰ বাবে বিজেপি দলৰ প্ৰয়োজন আছে বুলি উল্লেখ কৰে। এই অনুষ্ঠানত ভেৰগাঁও মণ্ডল বিজেপিৰ সভাপতি ফটীক কছাৰীৰ লগতে দলটোৰ বহু নেতা – কৰ্মী উপস্থিত আছিল।
